Trí rud (Fíorscéal)

Tháinig Paddy K orm gan choinne

feadh na canálach
is mé ag meabhrú
ar dhán eipiciúil
mé ag fálróid abhaile déanach

Tá sé reoite ann
Paddy K cré-umha
ach sa doircheacht bhain sé léimín beag bídeach asam
cheapas gur duine a bhí romham
ní raibh ann ach file
dealbh

Chuaigh leis an gcanáil a thrasnú
gur tháinig bean fé mo dhéin
ón mbruach thall
ainneoin na doircheachta
lasadh a balcaisí oíche
faoi ghealra
ligeas di an loc a thrasnú
bheith béasach, laidhc
Ise: Looking for business?
Nach fileata
Nach gonta
Mise: No, thanks.
Ise: Just polite, then.
Mise: Ya, Good night.

D’fhan Paddy K ina thost
Bhí sé beagfhoclach riamh

Ach bhí tugtha aige dom
dá dheargainneoin féin
trí rud;

Siren. Imram. Is teacht slán.

Haikuanna

I

Ruaigeann file cat
Meamhlach sa bhánfhuacht luath
Siúd luchóg! Seanfhocal.

II

Gluaiseann glaise ghlas
Ón sliabh ard go farraige síos
Líonfar na sléibhte arís

III

Faiche lomtha thall
Rás caisearbhán, fás aon lae,
Is scaiptear síolta

2016 (ina dtagann Pearse ar ais chuig Éire na linne seo)

Tháinig Pearse ar ais inné,

ar an Dart is é ag teacht ó Bhré,
thuirling ansin i lár na cathrach
is d’iarr de dhaoine go briste stadach
cá raibh sé go díreach, cén tír í seo?
is d’fhreagair i mBéarlagair iad ar fad d’aon ghuth
go raibh a éide iontach
go raibh a raidhfil gan lucht
glacfaimid selfie, snapchat is beidh tú Facebooked
agus sháigh chuige selfie sticks
gur ghlacadar, na pricks, pix
Ar ndóigh Éire atá ann, an bhfuil cúpla euro uait?
As an bpic a ghlacadh, tá sé tuillte agat.
Níl ná é, ach abairse liom
Cén bhliain atá ann? Seo Polacht na hÉireann?
Gháir siad is chroith lámh leis is mhol go hard é
ach bhíodar ar fad bailithe leo roimh dheireadh an lae
cheistigh sé is cheistigh ach freagra ní bhfuair
gur bhuail sé faoi ar an gcoincréit fhuar
is caitheadh cúpla cent lena thaobh
is páipeár nuachta is thosaigh á léamh
The Irish Times 2016
100 bliain tar éis gur éag
Léigh sé is léigh sé go raibh a shúile greamaitheach glaeúil gliúláilte.

Ní fada gur tháinig tuiscint dó.

Éire mo chlann féin
2 for the price of one
a dhíol a máthair
€2 for a hostel?
Mór mo ghlóir
Will ya ever fuck off One Direction are like my life.

Na dathanna, na fuaimeanna, na cairteanna mótair
Sluaite ag léimneach, ag liúrigh ag trasnú an bhóthair
Is boladh géarmhilischorr aisteach sa tsráid.

Is léimeann Pearse in airde
é tagtha chuige féin
is d’aon mhórléimt amháin
caitheann féin faoi aercoach.

Smaoineamh fáin ar foluain ina intinn istigh

Seans gurbh fhearr 2116 féin.